過去呢個星期真係好忙…
上星期返中，每日起身陪王子食早餐，傾下謁，王子放學又打俾我傾下電話…我放工，王子已經訓左覺囉…王子大個仔，佢話為左要陪我訓，就算自己一個訓係我房等我放工都好…
天珠介子開工時突然爛左，莫非已經幫我擋左一劫？
星期四下晝，老師打俾我，為左放假之前，王子學校運動會事件，我sent 既一封e mail，佢話叫我唔好對學校有'敵意'，我話我因為去旅行，所以先sent e mail，而我只係表明我唔覺得王子有錯，我唔明點解校長會同個學生嘈…同佢傾左一個多鐘，好在無野做…傾傾下，講起校長要王子絕對服從，佢話唔知道，佢話原來因為呢句話令我對學校反感，佢會跟進…我對老師講，我而家想影響王子變返有禮貌、有愛心既羊羊，唔好再做箭豬仔；我覺得當王子有自信心、開心、樂觀的話，佢既抵抗能力會高d，遇事會無咁易發脾氣；老師話我好提意，佢立刻話個目標係要王子愛敵人，我同佢講，目標唔可以一下子訂咁高，王子會抗拒既…點解老師要我提佢點教小朋友既？
星期五，一早起身又去爬繩…好攰哦…好在返到屋企陪王子、大師打邊爐…
星期六，又去爬繩，唔知醒，好在有同事按門鐘叫醒我…玩埋呢日，好攰哦…放工要出去LCK為慶祝媽咪生日食飯，又去家姐屋企樓下，好遠哦…
諗住去家姐屋企洗個白白，點知家姐出左街，我話想洗白白時，家姐話'要洗白白咁好笑既？'，聽到呢句，我突然好嬲，做咩笑我，人地已好攰，仲要咁夜去咁遠食飯，都無諗過我感受，我只係想洗白白，仲要笑我？好嬲…於是係旺角行街，大師係電話聽到我好嬲，立刻過黎陪我，最後我去左媽咪屋企洗白白…
食飯時，而家咁多小朋友，家姐點都仲要坐一圍就算，坐得好辛苦…唔高興哦…我同媽咪都話，下次出黎做節食飯，如果又係一圍咁坐，就唔食喇…
返到屋企，好攰哦…大師病左咁耐，都未好返哦
星期日，一早，大師病左，就由我送王子去童軍，之後我就自己一個去音小崇拜。去到，感覺幾好，有婆婆同我打招呼，我鍾意佢地哦；唔知點解，每逢去到教堂，總令我諗起好多野，好易感動，總有喊既衝動…諗過可能會見到king，如果見到面，我會唔自在，所以我就好專心咁，唔去搵，唔去望…
崇拜完，我去聽king同郭太推薦既講座…去到，我sms通知king我到左，佢上黎搵我…聽完講座，我再同羅博士傾左一陣，我一講起王子，就忍唔住喊…
傾完，阿king順路送我到MTR，我自己行左一陣，就返屋企。
休息左一陣，夜晚同大師去佢屋企食飯，同王子佢地返左屋企之後，我又要去返工喇
星期一放工，返到屋企，休息左一陣，大師無走，佢好唔舒服，想係香港休息下。十二點幾起身，打去音小，陳太已經唔係度。同阿king MSN 傾左一陣，的起心肝出發。見到陳太，傾左一個鐘，主要都係我同陳太講王子既野，一開始，諗到王子，我又忍唔住喊。每次諗到王子而家咁唔開心，咁大壓力，我就好唔開心，好想幫王子。傾完之後，陳太話我即管試下報名，之後叫我上去校務處攞學校簡介…
見到king接女女放學，我同阿king講就係咁…阿king話陳太知道，就會盡力…不過當我話就係咁咁咁，佢話人地都只可以咁，無能力影響收人架…咁我都知道…不過算啦，正如我之前自己諗，我而家只係做所有做得既野，盡左力，得唔得就由天…
夜晚仲要返工，好攰哦…
星期二放工，接王子放學，同王子食下午茶時傾謁，我叫王子做羊羊，王子話"媽咪你無聽過'笑裡藏刀咩？出面d人好衰，我做箭豬，我要保護自己嘛"…唉…王子個世界點解會咁架？
大師仍然好唔舒服，王子爸爸陪王子食飯，我同大師出街街…
星期三，同阿king msn，佢仍然話係我有問題，因為所有野都係我影響王子；我的確都學緊要平和d，要更加感恩，對人更加有愛心；不過我自問我係一個有禮貌、會照顧人感受、易相處、唔易發脾氣既人，但係王子係咁，要做箭豬仔(最弊係佢內心係隻好傻既羊呢)，王子既世界咁灰暗？阿king繼續話我，我唔再反駁…我知佢為我好，不過我未接受到；可能我覺得我已經盡力，點解佢睇唔到？點解仲要咁話我？可能佢就係緊張我，想我快d變好…
去王子學校見老師，今次係見學生發展主任，佢話問過校長，校長無話過要絕對服從，話係社工自己會錯意，叫我唔好介意(我見到社工好尷尬咁，佢食左死貓，真係慘)，話想家校合作，話成間學校老師、校長都只係想學生好，話王子近來乖左，見到王子努力去進步緊…好一個公關…聽落幾好，我當然接受啦…
之前同大師傾過，大師話，其實王子轉校，如果王子性格仍然係咁、如果有問題既係王子，轉左校，對王子都無幫助，王子仲要認識新同學，打入人地圈子，可能更加唔開心；的確令我有d動搖，不過唔趁而家四年紀，唔趁我有心去做，就唔會再轉校；萬一遲d再出事，咁點算呢？而且王子係呢度已經令佢焦慮，對校長有成見，情緒影響學習，試一試轉校，可能對王子係好…感覺有d壓力，轉校，唔知道係好事？壞事？影響王子一生…
上年諗過而無轉，今年再發生咁多事，去旅行同人傾開，突然又同阿king聯絡返…可能係上天提醒我係時候要幫王子做d野，雖然我會盡力，不過轉唔轉到，都係要睇王子…
夜晚同大師帶王子去學劍，大師陪我行左一陣，唔舒服，自己返屋企先…擔心大師哦…
